Dakshinamurthy Stotram in Bengali

মৌনব্যাখ্যাপ্রকটিতপরব্রহ্মতত্ত্বং যুবানং বর্ষিষ্ঠান্তে বসদৃষিগণৈরাবৃতং ব্রহ্মনিষ্ঠৈঃ । আচার্যেন্দ্রং করকলিতচিন্মুদ্রমানন্দরূপং স্বাত্মারামং মুদিতবদনং দক্ষিণামূর্তিমীডে ॥

maunavyākhyāprakaṭitaparabrahmatattvaṃ yuvānaṃ varṣiṣṭhānte vasadṛṣigaṇairāvṛtaṃ brahmaniṣṭhaiḥ | ācāryendraṃ karakalitacinmudramānandarūpaṃ svātmārāmaṃ muditavadanaṃ dakṣiṇāmūrtimīḍe ||

বিশ্বং দর্পণদৃশ্যমাননগরীতুল্যং নিজান্তর্গতং পশ্যন্নাত্মনি মাযযা বহিরিবোদ্ভূতং যথা নিদ্রযা । যঃ সাক্ষাত্কুরুতে প্রবোধসমযে স্বাত্মানমেবাদ্বযং তস্মৈ শ্রীগুরুমূর্তযে নম ইদং শ্রীদক্ষিণামূর্তযে ॥ ১॥

viśvaṃ darpaṇadṛśyamānanagarītulyaṃ nijāntargataṃ paśyannātmani māyayā bahirivodbhūtaṃ yathā nidrayā | yaḥ sākṣātkurute prabodhasamaye svātmānamevādvayaṃ tasmai śrīgurumūrtaye nama idaṃ śrīdakṣiṇāmūrtaye || 1||

বীজস্যান্তরিবাঙ্কুরো জগদিদং প্রাঙ্নির্বিকল্পং পুনঃ মাযাকল্পিতদেশকালকলনাবৈচিত্র্যচিত্রীকৃতম্ । মাযাবীব বিজৃম্ভযত্যপি মহাযোগীব যঃ স্বেচ্ছযা তস্মৈ শ্রীগুরুমূর্তযে নম ইদং শ্রীদক্ষিণামূর্তযে ॥ ২॥

bījasyāntarivāṅkuro jagadidaṃ prāṅnirvikalpaṃ punaḥ māyākalpitadeśakālakalanāvaicitryacitrīkṛtam | māyāvīva vijṛmbhayatyapi mahāyogīva yaḥ svecchayā tasmai śrīgurumūrtaye nama idaṃ śrīdakṣiṇāmūrtaye || 2||

যস্যৈব স্ফুরণং সদাত্মকমসত্কল্পার্থকং ভাসতে সাক্ষাত্তত্ত্বমসীতি বেদবচসা যো বোধযত্যাশ্রিতান্ । যত্সাক্ষাত্করণাদ্ভবেন্ন পুনরাবৃত্তির্ভবাম্ভোনিধৌ তস্মৈ শ্রীগুরুমূর্তযে নম ইদং শ্রীদক্ষিণামূর্তযে ॥ ৩॥

yasyaiva sphuraṇaṃ sadātmakamasatkalpārthakaṃ bhāsate sākṣāttattvamasīti vedavacasā yo bodhayatyāśritān | yatsākṣātkaraṇādbhavenna punarāvṛttirbhavāmbhonidhau tasmai śrīgurumūrtaye nama idaṃ śrīdakṣiṇāmūrtaye || 3||

নানাচ্ছিদ্রঘটোদরস্থিতমহাদীপপ্রভাভাস্বরং জ্ঞানং যস্য তু চক্ষুরাদিকরণদ্বারা বহিঃ স্পন্দতে । জানামীতি তমেব ভান্তমনুভাত্যেতত্সমস্তং জগত্ তস্মৈ শ্রীগুরুমূর্তযে নম ইদং শ্রীদক্ষিণামূর্তযে ॥ ৪॥

nānācchidraghaṭodarasthitamahādīpaprabhābhāsvaraṃ jñānaṃ yasya tu cakṣurādikaraṇadvārā bahiḥ spandate | jānāmīti tameva bhāntamanubhātyetatsamastaṃ jagat tasmai śrīgurumūrtaye nama idaṃ śrīdakṣiṇāmūrtaye || 4||

দেহং প্রাণমপীন্দ্রিযাণ্যপি চলাং বুদ্ধিং চ শূন্যং বিদুঃ স্ত্রীবালান্ধজডোপমাস্ত্বহমিতি ভ্রান্তা ভৃশং বাদিনঃ । মাযাশক্তিবিলাসকল্পিতমহা ব্যামোহসংহারিণে তস্মৈ শ্রীগুরুমূর্তযে নম ইদং শ্রীদক্ষিণামূর্তযে ॥ ৫॥

dehaṃ prāṇamapīndriyāṇyapi calāṃ buddhiṃ ca śūnyaṃ viduḥ strībālāndhajaḍopamāstvahamiti bhrāntā bhṛśaṃ vādinaḥ | māyāśaktivilāsakalpitamahā vyāmohasaṃhāriṇe tasmai śrīgurumūrtaye nama idaṃ śrīdakṣiṇāmūrtaye || 5||

রাহুগ্রস্তদিবাকরেন্দুসদৃশো মাযাসমাচ্ছাদনাত্ সন্মাত্রঃ করণোপসংহরণতো যোঽভূত্সুষুপ্তঃ পুমান্ । প্রাগস্বাপ্সমিতি প্রবোধসমযে যঃ প্রত্যভিজ্ঞাযতে তস্মৈ শ্রীগুরুমূর্তযে নম ইদং শ্রীদক্ষিণামূর্তযে ॥ ৬॥

rāhugrastadivākarendusadṛśo māyāsamācchādanāt sanmātraḥ karaṇopasaṃharaṇato yo’bhūtsuṣuptaḥ pumān | prāgasvāpsamiti prabodhasamaye yaḥ pratyabhijñāyate tasmai śrīgurumūrtaye nama idaṃ śrīdakṣiṇāmūrtaye || 6||

বাল্যাদিষ্বপি জাগ্রদাদিষু তথা সর্বাস্ববস্থাস্বপি ব্যাবৃত্তাস্বনুবর্তমানমহমিত্যন্তঃ স্ফুরন্তং সদা । স্বাত্মানং প্রকটীকরোতি ভজতাং যো মুদ্রযা ভদ্রযা তস্মৈ শ্রীগুরুমূর্তযে নম ইদং শ্রীদক্ষিণামূর্তযে ॥ ৭॥

bālyādiṣvapi jāgradādiṣu tathā sarvāsvavasthāsvapi vyāvṛttāsvanuvartamānamahamityantaḥ sphurantaṃ sadā | svātmānaṃ prakaṭīkaroti bhajatāṃ yo mudrayā bhadrayā tasmai śrīgurumūrtaye nama idaṃ śrīdakṣiṇāmūrtaye || 7||

বিশ্বং পশ্যতি কার্যকারণতযা স্বস্বামিসংবন্ধতঃ শিষ্যাচার্যতযা তথৈব পিতৃপুত্রাদ্যাত্মনা ভেদতঃ । স্বপ্নে জাগ্রতি বা য এষ পুরুষো মাযাপরিভ্রামিতঃ তস্মৈ শ্রীগুরুমূর্তযে নম ইদং শ্রীদক্ষিণামূর্তযে ॥ ৮॥

viśvaṃ paśyati kāryakāraṇatayā svasvāmisaṃbandhataḥ śiṣyācāryatayā tathaiva pitṛputrādyātmanā bhedataḥ | svapne jāgrati vā ya eṣa puruṣo māyāparibhrāmitaḥ tasmai śrīgurumūrtaye nama idaṃ śrīdakṣiṇāmūrtaye || 8||

ভূরম্ভাংস্যনলোঽনিলোঽম্বরমহর্নাথো হিমাংশুঃ পুমান্ ইত্যাভাতি চরাচরাত্মকমিদং যস্যৈব মূর্ত্যষ্টকম্ । নান্যত্কিঞ্চন বিদ্যতে বিমৃশতাং যস্মাত্পরস্মাদ্বিভোঃ তস্মৈ শ্রীগুরুমূর্তযে নম ইদং শ্রীদক্ষিণামূর্তযে ॥ ৯॥

bhūrambhāṃsyanalo’nilo’mbaramaharnātho himāṃśuḥ pumān ityābhāti carācarātmakamidaṃ yasyaiva mūrtyaṣṭakam | nānyatkiñcana vidyate vimṛśatāṃ yasmātparasmādvibhoḥ tasmai śrīgurumūrtaye nama idaṃ śrīdakṣiṇāmūrtaye || 9||

সর্বাত্মত্বমিতি স্ফুটীকৃতমিদং যস্মাদমুষ্মিন্ স্তবে তেনাস্য শ্রবণাত্তদর্থমননাদ্ধ্যানাচ্চ সঙ্কীর্তনাত্ । সর্বাত্মত্বমহাবিভূতিসহিতং স্যাদীশ্বরত্বং স্বতঃ ততঃ সিদ্ধ্যেত্তত্পুনরষ্টধা পরিণতং চৈশ্বর্যমব্যাহতম্ ॥ ১০॥

sarvātmatvamiti sphuṭīkṛtamidaṃ yasmādamuṣmin stave tenāsya śravaṇāttadarthamananāddhyānācca saṅkīrtanāt | sarvātmatvamahāvibhūtisahitaṃ syādīśvaratvaṃ svataḥ tataḥ siddhyettatpunaraṣṭadhā pariṇataṃ caiśvaryamavyāhatam || 10||

বটবিটপিসমীপে ভূমিভাগে নিষণ্ণং সকলমুনিজনানাং জ্ঞানদাতারমারাত্ । ত্রিভুবনগুরুমীশং দক্ষিণামূর্তিদেবং জননমরণদুঃখচ্ছেদদক্ষং নমামি ॥

vaṭaviṭapisamīpe bhūmibhāge niṣaṇṇaṃ sakalamunijanānāṃ jñānadātāramārāt | tribhuvanagurumīśaṃ dakṣiṇāmūrtidevaṃ jananamaraṇaduḥkhacchedadakṣaṃ namāmi ||